چاپي بڼه
 

د ٢٠٠٧ کال د جون ١٦

جرمنی ، د کولن ښار

په خواشينۍ سره مو خبر تر لاسه کړ چې د افغانستان نامتو فرهنګي  او ټولنيزشخصيت  ، ليکوال او څېړونکی سيداګل غريبيار د زړه د حملې له کبله تېره شپه د جلال آباد په ښار کې له نړۍ سترګې پټې کړې .

انا لله و انا اليه راجعون

ارواښاد سيداګل غريبيار چې له ډېرو کلونو راهيسې په امريکا کې اوسېده، يوه مياشت وړاندې خپل هېواد ته تللی و . هغه له هېواده لېرې هم د، د وطن د کلتور د ودې او سمسورتيا لپاره نه ستړې کېدونکې هلې ځلې کولې او په ټولنيزو ، ملي او کلتوري هلو ځلو کې ډېر فعال و .

د ارواښاد غريبيار په آثارو کې د ملنګ جان د شعرونو د يوې بشپړ ې ټولګې راټولول او خپرول ، د نوميالي افغان وزير صاحب محمد ګل خان مومند د ژوند او شخصيت په اړه يو مهم تحقيق او د پښتنو د اولسي ادبياتو د ځينو اړخونو په اړه ارزښتناکې څېړنې  په ځانګړې توګه د يادونې وړ دي .

د افغانستان د کلتوري ودې ټولنه ، په داسې حال کې چې دخپل دغه نوميالي  ليکوال مړينه لويه ضايعه ګڼي ، هغوی ته د الله (ج) په دربار کې د فردوس جنت دعا کوي ، له کورنۍ ، دوستانو او افغاني کلتوري کړيو سره په دغه غم کې ځانونه  شريک ګڼي .

په درناوي

د ټولنې د مشرتابه جرګه

 

 
بېرته شاته